É o primoxénito dos Parques Naturais de Galicia e, ao mesmo tempo, o máis pequeno dos seis. Descubre con #ParqueVibras o Monte Aloia, un lugar con restos prehistóricos e romanos e unhas vistas impresionantes sobre o río Miño. Máis do 80 % da súa superficie é arborada.
Onde está?
O Parque Natural Monte Aloia sitúase no concello de Tui (a media hora de Vigo). Forma parte da Serra do Galiñeiro e a súa extensión é tan só de 746 hectáreas, o que o converte no máis pequeno da comunidade. Os terreos son propiedade da entidade local menor de Pazos de Reis e da comunidade veciñal de montes en man común da parroquia de Rebordáns. Para acceder a el non é necesario ningún permiso especial.
O parque natural pioneiro de Galicia
O Monte Aloia é parque natural desde o 4 de decembro de 1978. Nesta declaración xogou un papel relevante Rafael Areses Vidal (1878-1953), un enxeñeiro de montes natural de Tui impulsor dos primeiros viveiros forestais de Galicia, dos cales un estivo no Monte Aloia. Ademais, promoveu a súa reforestación e posta en valor. A súa singular casa, construída no ano 1921, é actualmente o centro de visitantes do parque.
Miradoiros: prepara o teu móbil para unhas vistas únicas
Unha visita ao Monte Aloia ten garantido unhas vistas privilexiadas dos vales dos ríos Miño e Louro. Ao longo dos seus roteiros hai varios miradoiros desde os que conseguir unhas imaxes únicas para subir as túas ST de Instagram ou TikTok.
-
- González Páramos ou Alto de San Xiao (altitude de 631 m): conta cunhas vistas excepcionais xa que se poden ver as illas Cíes e Ons, ademais da serra do Galiñeiro.
- Enxeñeiro Rafael Areses (633 m): subir ata aquí posibilita gozar dunha panorámica sobre o Miño, a vila de Tui e o norte de Portugal. Aséntase sobre unha rocha que formaba parte dunha antiga fortaleza.
- Gran Cruz (630 m): é o punto máis alto do parque, o cal permite ter unhas panorámicas extraordinarias do Miño, Tui e, incluso, nos días máis despexados, do Parque Natural Baixa Limia-Serra do Xurés.
- Celta (604 m): outro lugar desde o que divisar o val do Miño, Tui e terras lusas. Atópase na ruta da muralla.
- O Castelo (618 m): situado sobre unha gran rocha, desde del divísase a ría de Vigo ou o monte Santa Trega.
- Oliva (564 m): accédese a el polo sendeiro do mesmo nome. Ofrece unhas gran vistas do val de Tui.
Fauna: gran representación de anfibios
O máis destacado da fauna deste parque natural son os anfibios pola súa abundancia e diversidade xa que nel habitan 11 das 14 especies coñecidas en Galicia, destacando as píntegas, o tritón ibérico e o xaspeado, así como dous endemismos ameazados: a píntega rabilonga e a ra patilonga.
Entre os mamíferos que habitan no Monte Aloia destacan o esquío, a xeneta ou o raposo, ademais de cabalos bravos. Nas aves, diferentes tipos de ferreiriños, mouchos e aves rapaces diurnas, como o gabián, o miñato común ou o azor.
Patrimonio arqueolóxico
Ademais do seu valor natural, o Parque Natural Monte Aloia destaca polo seu patrimonio material. O castro do Alto dos Cubos, parcialmente reconstruido, varias mámoas e petróglifos, son algúns dos exemplos. Un dos elementos máis destacados é unha muralla ciclópea, de pedra, de máis de 3000 metros de lonxitude. Non se sabe con certeza cal é a súa orixe, aínda que o máis posible é que fora construida en varias etapas (romana, sueva, invasión francesa).
A casa deseñada polo enxeñeiro Rafael Areses, de 1921, actual centro de interpretación, e a capela de San Xiao, reconstruida en 1713 sobre un antigo templo románico, son actualmente as edificacións máis salientables.
O Parque Natural Monte Aloia conta con oito rutas autoguiadas; a maioría son de dificultade baixa ou media e transcurren entre muíños de auga, miradoiros, bosques de ribeira e regatos. Será unha delas a que escollas cando gañes o concurso #ParqueVibras?